லெப்.கேணல் முத்தலிப்பை படுகொலைசெய்த இராணுவ அதிகாரி கைது..?

இலங்கை இராணுவப் புலனாய்வு அதிகாரியான லெப்.கேணல் முத்தலிப்பை, சக இராணுவ அதிகாரி ஒருவரே புலிகளிடம் பணத்தைப் பெற்றுக் கொண்டு கொலை செய்துள்ளார் என்று தெரியவந்துள்ளது.

வன்னியில் கண்டுபிடிக்கப்பட்ட புலிகளின் இரகசிய ஆவணம் ஒன்றையடுத்து இந்தக் கொலையில் தொடர்புடைய சந்தேகநபரான இராணுவ அதிகாரி கைது செய்யப்பட்டுள்ளார்.

கடந்த 2005ம் ஆண்டு மே மாதம் கொத்தலாவல பாதுகாப்புக் கல்லூரிக்குச் சென்று கொண்டிருந்த போது கிருலப்பனையில் வைத்து லெப்.கேணல் முத்தலிப் சுட்டுக்கொலை செய்யப்பட்டார்.

வன்னியிலும் கிழக்கிலும் விடுதலைப் புலிகளின் மீது இலங்கை இராணுவத்தின் ஆழ ஊடுருவும் அணிகளால் நடத்தப்பட்ட கிளைமோர் தாக்குதல்களுக்கு இவர் பொறுப்பாக இருந்தவர் என்பது குறிப்பிடத்தக்கது.

இதனால், லெப்.கேணல் முத்தலிப் மீதான தாக்குதலை விடுதலைப் புலிகளே நடத்தியதாக இலங்கை அரசாங்கம் குற்றம்சாட்டியிருந்தது.

இந்தநிலையில், வன்னியின் கிழக்குப் பகுதியில் மீட்கப்பட்ட விடுதலைப் புலிகளின் இரகசியப் புலனாய்வு ஆவணங்களில் ஒன்றில், லெப்.கேணல் முத்தலிப்பை படுகொலை செய்வதற்கு இலங்கை இராணுவ அதிகாரி ஒருவருக்கு புலிகள் 1.5 மில்லியன் ரூபாவை வழங்கியது தெரியவந்துள்ளது.

இதன் அடிப்படையிலேயே அந்த இராணுவ அதிகாரி கைது செய்யப்பட்டு விசாரிக்கப்பட்டு வருகிறார்