எகிப்தின் துணை ஜனாதிபதியாக கிறிஸ்தவ பெண்ணை நியமிக்க திட்டம்..?

எகிப்து ஜனாதிபதியாக தேர்வான முஸ்லிம் சகோதரத்துவ அமைப்பின் மொஹமட் முர்சி தனது துணை ஜனாதிபதிகளாக பெண் ஒருவரையும் கிறிஸ்தவர் ஒருவரையும் நியமிக்க திட்டமிட்டுள்ளார்.

மொஹமட் முர்சியின் கொள்கை ஆலோசகரான அஹமட் டைப், சி.என்.என். தொலைக்காட்சிக்கு இந்த தகவலை தெரிவித்தார். “எகிப்து வரலாற்றில் முதல் முறையாக பெண் ஒருவர் துணை ஜனாதிபதி பதவியை ஏற்கவுள்ளார். இது வெறுமனே துணை ஜனாதிபதியாக மட்டுமல்லாது அவர் அதிகாரம் மிக்கவராகவும் ஜனாதிபதியின் தவறுகளை விமர்சிக்கக் கூடியவராகவும் இருப்பார்” என்று அஹமட் டைப் குறிப்பிட்டுள்ளார்.

இந்நிலையில் மொஹமட் முர்சியின் அமைச்சரவையில் பிரதமர் பதவியை ஏற்பதற்கு நோபல் விருது வென்ற ஐ.நா. அணு கண்காணிப்பகத்தின் முன்னாள் தலைவர் மொஹமட் அல் பரதி பல நிபந்தனைகளை விதித்துள்ளதாக செய்தி வெளியாகியுள்ளது. இது தொடர்பில் முஸ்லிம் சகோதரத்துவ அமைப்பின் உயர் மட்டக் குழுவொன்று அல் பரதியை சந்தித்து பேச்சுவார்த்தை நடத்தியபோதே இந்த நிபந்தனைகள் விதிக்கப்பட்டுள்ளதாக தெரிய வருகிறது.

இதன் போது பிரதமரின் பொறுப்புகள் குறித்து வரையறுக்கப்பட வேண்டும் என்றும் தமக்கு பெயரளவில் பிரதமராக இருக்க முடியாது எனவும் குறிப்பிட்டுள்ளார். அத்துடன் புதிய அமைச்சரவையில் பெரும்பாளானோர் துறைசார் நிபுணர்களாக இருக்க வேண்டும் என்றும் முஸ்லிம் சகோதரத்துவ அமைப்புக்கு இரண்டு ஆசனங்களுக்கு மேல் வழங்கக் கூடாது என்றும் அதுவே சலபிகளுக்கு ஒரு ஆசனமே வழங்கப்பட வேண்டும் என்றும் நிபந்தனை விதித்துள்ளார்.

இதில் அமைச்சரவையின் துறைசார் நிபுணர்கள் அரசியல் கட்சி சார்பானவர்களாக இருக்க கூடாது என்றும் அல் பரதி நிபந்தனை விதித்துள்ளார்.