முஸ்லிம்களே..! தம்புள்ள பள்ளியை அகற்றுவதில்லை என்பதில் உறுதியாக நில்லுங்கள் - அமைச்சர் ஜனக பண்டார

சஞ்சாரி

அகில இலங்கை ஜம்மியத்துல் உலமா மற்றும் அகில இலங்கை முஸ்லிம் லீக் வாலிப முன்னணிகளின் சம்மேளனத் தூதுக்குழு ஒன்று கடந்த வியாழனன்று காணி, காணிஅபிவிருத்தி அமைச்சர் ஜனக பண்டார தென்னகோனை கொழும்பிலுள்ள அவரது இல்லத்தில் சந்தித்து தம்புள்ளை பள்ளிவாசல் தொடர்பான பிரச்சினை பற்றி உரையாடியுள்ளது.

பள்ளிவாசல் நீண்டகால வரலாற்றினையுடையது என்று பல உதாரணங்களை எடுத்துக்கூறி விளக்கினர்.

அமைச்சர் ஏ.எச்.எம். பௌசி 1975ல் ஒரு முறை கட்சி கூட்டம் ஒன்றுக்காக அவர் எனது வீட்டுக்கு வந்திருந்தார். அது நோன்பு காலம். நோன்பு திறப்பதற்கு பள்ளிவாசலுக்குப் போக வேண்டும் என்றார். அவருடன் நானும் அப்பள்ளிவாசலுக்கு முதன் முறையாகச் சென்றேன்.

அப்போது பள்ளிவாசல் சிறியதாகவே இருந்தது. நான் பள்ளிவாசல் நம்பிக்கையாளர்களிடம் ஏன் இந்தப் பள்ளிவாசலை இப்படி வைத்திருக்கிறீர்கள் நன்றாக கட்டுங்கள் என்று ஆலோசனை தெரிவித்தேன்.

எனது தொகுதியில் பள்ளிவாசல் ஒன்று அப்படியிருப்பதனை நான் விரும்பாததாலே அப்படிச் சொன்னேன். இந்தப் பள்ளிவாசல் விடயத்தில் நான் உறுதியாக இருக்கின்றேன். அதே போன்று நீங்களும் உறுதியாக இருக்க வேண்டும் என்றார். நானும் தம்புள்ளை மக்களும் உறுதியாக இருக்கும்போது உங்கள் தலைவர்கள் சிலர் மறுபக்கமாகப் பேசியது கவலையை அளிக்கின்றது என்றார்.

அகில இலங்கை ஜம்மியத்துல் உலமாவின் தலைவர அஷ்ஷேக் ரிஸ்வி முப்தி உண்மையின் பக்கம் அமைச்சர் இருப்பதற்கு சமூகத்தின் சார்பில் நன்றி தெரிவித்தார்.

மௌலவி எம்.எஸ்.எம். தாஸிம், முஸ்லிம் லீக் வாலிப முன்னணியின் பொருளாளர் சாம் நவாஸ், தேசிய அமைப்பாளர் எஸ்.எம்.எம். இம்தியாஸ் மற்றும் முஹம்மத் நஸீர், உலமாக்கட்சித் தலைவர் முபாரக் அப்துல் மஜீதும் இதில் பங்குபற்றினர்.