தம்புள்ள பள்ளிவாசலுக்காக கருணாநிதி முதலைக்கண்ணீர் வடிக்கிறார் - அஸ்வர் எம்.பி.

TV

அயோத்திய நகரில் பாபர் மசூதி இடித்துத்தள்ளப்பட்டபோது மெளனம் காத்த தி.மு.க தலைவர் முத்துவேல் கருணாநிதி தம்புள்ளை பள்ளிவாசல் விவகாரத்தில் முதலைக் கண்ணீர் வடிப்பது ஏன்? இவ்வாறு ஏ.எச்.எம். அஸ்வர் எம்.பி கேள்வி எழுப்பி யுள்ளார்.

நேற்று முன்தினம் அளுத்கடையில் நடைபெற்ற முஸ்லிம்களுடனான கலந்துரையாடல் நிகழ்வொன்றில் உரையாற்றிய அஸ்வர் எம்.பி, தமிழகத்தில் மீண்டும் அதிகாரத்துக்காக வருவதற்காகவும், முதல்வர் ஜெயலலிதாவின் அரசியல் தந்திரங்களை தவிடு பொடியாக்கு வதற்காகவும் தான் சிறுபான்மை மக்களின் பாதுகாவலன் எனக் காட்டிக் கொள்ள முயற்சிக்கின்றார்.

கருணாநிதியின் இந்த நடவடிக்கை சர்வதேச சதித்திட்டத்தின் ஓர் அங்கமே. வடக்கு மாகாணத்தில் முஸ்லிம்கள் இரவோடிரவாக விரட்டப்பட்ட போதும், காத்தான்குடி, ஏறாவூரில் பள்ளிவாசல்களில் முஸ்லிம்கள் படுகொலை செய்யப்பட்டபோதும் வாளாவிருந்த கலைஞர், இப்போது முஸ்லிம்களுக்காக நீலிக்கண்ணீர் வடிப்பது தான் புதிராகவுள்ளது.

தம்புள்ளை பள்ளி விவகாரத்தில் முஸ்லிம் அமைச்சர்களும், மக்கள் பிரதிநிதிகளும் ஆக்க பூர்வமான நடவடிக்கையில் ஈடுபட்டு வரு கின்றனர். அரசாங்கமும் ஜனாதிபதியும் இதற் கான தீர்வைப் பெற்றுத்தருவரென முஸ்லிம்கள் பெரிதும் நம்புகின்றனர். எனவே இறைமையுள்ள இந்நாட்டின் உள் விவகாரங்களில் கலைஞர் மூக்கை நுழைப்பது ஆரோக்கியமானதல்ல என்று அஸ்வர் எம்.பி தெரிவித்தார்.