அரசியல் வாதிகளே தம்புள்ள பள்ளிவாசல் பிரச்சினைக்கு காரணம் - புதுக்கதை சொல்லும் மஹிந்த

தம்புள்ள பள்ளிவாசல் பிரச்சினைக்கு விரைவில் சுமுகமான தீர்வு காணப்படுமென ஜனாதிபதி மகிந்த ராஜபக்ஷ உறுதியளித்துள்ளார். மாத்தளை மாநகர பிதா முஹமட் ஹில்மி கரீம் கடந்த ஞாயிற்றுக்கிழமை ஜனாதிபதி மகிந்த ராஜபக்ஷவை சந்தித்து தம்புள்ள பள்ளிவாசல் விவகாரம் தொடர்பாக கலந்துரையாடிய போதே ஜனாதிபதி இதனைத் தெரிவித்துள்ளார்.

ஜனாதிபதி மகிந்த ராஜபக்ஷ மேலும் தெரிவித்துள்ளதாவது,

மாத்தளை மாவட்டத்திலுள்ள இரண்டு அரசியல் வாதிகளுக்கிடையில் ஏற்பட்ட தனிப்பட்ட பிரச்சினையே தம்புள்ள பள்ளிவாசல் வரை சென்றுள்ளது.

கடந்த மாதம் 19 ஆம் திகதி இரவு எனக்கு கிடைத்த தொலைபேசி அழைப்புகளை அடுத்து உடனடியாக பொலிஸ் மா அதிபர், பிரதி பொலிஸ் மா அதிபர் ,சிரேஷ்ட, பொலிஸ் அத்தியட்சகர் ஆகியோருடன் தொடர்பு கொண்டு விஷேட அதிரடிப் படையினரின் சேவையைப் பெற்றுக் கொண்டதன் மூலம் மறு நாள் வெள்ளிக்கிழமை இடம்பெறவிருந்த வன்முறைகளும் தவிர்க்கப்பட்டன.

வதந்திகள் மூலம் இப்பிரச்சினை ஊதிப்பெரிதாக்கப்பட்டு விட்டது. அப்படியில்லாத பட்சத்தில் மிக சுமுகமாகப் பேச்சுவார்த்தை மூலம் இப்பிரச்சினைக்கு தீர்வு காண முடிந்திருக்கும்.

இது விடயமாக கண்டி தலதா மாளிகையின் தியவதனே நிலமே பிரதீப் தேல பண்டார, அஸ்கிரிய மகா நாயகத் தேரர் உட்பட பௌத்த சமய தரப்பினர் பலருடனும் பேசியுள்ளதாக ஜனாதிபதி இச்சந்திப்பின் போது மேலும் தெரிவித்தார்.