யாழ்ப்பாணத்தில் பேரிச்சம் பழம்...!

யாழ்ப்பாணத்தின் சில பிரதேசங்களில் பேரீச்சம் மரங்கள் காணப்படுவதை நாம் அவதானித்துள்ளோம். இருந்தபோதும் முதன்முறையாக பேரீச்சம்பழ மரமொன்று காய்த்து, பழுத்த நிலையில் காணப்படுவதாக அறியவருகிறது.

ஏ9 வீதியிலுள்ள நாவற்குழி, உப்பாற்று பாலத்திற்கு அண்மையில் இவ்வாறு பேரீச்சம் பழ மரமொன்று காணப்படுவதாகவும், அதில் பேரீச்சம் பழங்கள் காய்த்து குலுங்குவதாகவும், அப்பகுதியால் செல்பவர்கள் அவற்றை சுவைத்துச் செல்வதாகவும் கூறப்படுகிறது.

இலங்கையில் ஏற்கனவே காத்தான்குடி, புத்தளம் போன்ற பிரதேசங்களில் பேரிச்சம் மரங்கள் காணப்படுவதும், அவற்றிலிருந்து பேரிச்சம் பழங்கள் கிடைத்துவரும் நிலையில் தற்போது யாழ்ப்பாணத்திலும் பேரிச்சம்பழம் பற்றிய தகவல் வெளியாகியுள்ளது.

இதுகுறித்து விவசாய ஆராயச்சியாளர்கள் தமது கவனத்தை திருப்புமிடத்து யாழ்ப்பாணத்தில் இருந்தும் பேரிச்சம் பழங்களை பெற்றுக்கொள்ள முடியுமென்பதும், அதன் மூலம் பயனடையலாமென்பதும் யாழ் முஸ்லிம் இணையத்தின் எதிர்பார்ப்பாகும்.