யாழ் முஸ்லிம் இணையம் போதையூட்டுகிறது...? (விமர்சனம்)

உங்கள் இணையத்தளத்தில் வரும் செய்திகளை வாசிக்கும் வாசகர்களில் நானும் ஒருவன். உங்கள் செய்திகளை மேய்ந்து விட்டு செல்லும் கறுப்பாடுகளிலும் நானும் ஒருவனே. யாழ்பாண முஸ்லிம்களிற்காக யாழ்ப்பாண விவகாரங்களை யாழ்ப்பாணத்தான் எழுதுவது சிறப்பானது. அந்த சிறப்பான பணியை செய்யும் யாழ் முஸ்லிம் இணையத்திற்கு ஒரு சின்ன குறிப்பு.

யாழ்ப்பாண முஸ்லிம்களின் உயற்சிக்கும், எழுச்சிக்கும் உரமாகவும், பக்கபலமாகவும் செயற்படும் உங்கள் இணையத்தளம், யாழப்பாண முஸ்லிம்கள் சம்மந்தமாக காத்திரமான பல பங்களிப்புக்களை செய்துள்ளது. களத்தில் சிந்திக்க மறந்த பலவற்றை தளத்தில் தெரியப்படுத்தியுள்ளீர்கள். களத்தில் பேச மறுத்த பல விடயங்களை தளத்தில் பேசியுள்ளீர்கள். புலம்பெயர் முஸ்லிம்களும், யாழ் முஸ்லிம்களும் இணையும் மையம் உங்கள் யாழ் முஸ்லிம் இணையத்தளம். பல முரண்பாடுகள் உங்கள் தளத்தின் ஊடாக சமரசமான சமாச்சாரங்களுமுண்டு.

அந்த வகையில் யாழ்ப்பாண உணர்வுகள் மங்காதவாறு யாழ் முஸ்லிம்களின் உள்ளங்களை பதப்படுத்தி வைக்கும் உங்கள் எழுத்து வண்ணம் எல்லோருக்கும் வாய்ப்பதில்லை. கடந்த சில தினங்களாக உங்கள் தளம் முழுக்கவும் யாழ் மயம். கடந்த யாழ் முஸ்லிம் ஒன்று கூடலில் கிடைத்த திருப்தியினைவிட உங்கள் தளத்தில் சில நாட்களாக கொடிகட்டும் யாழ் பசுமை நினைவுகள் தொடர்பான திருப்தி அதிகம் என என் நண்பர் ஒருவர் அலாதியாக கூறினார். உண்மைதான். யாழ்ப்பாண பசுமைகள் இனிமையானவையே.

ஆனால் இந்த பசுமைகள் என்பது ஒரு வகை போதை. ஒரு ஏகாந்த கிரக்கத்தில் யாழ் முஸ்லிம்களை மீண்டும் மீண்டும் தள்ளுகிறீர்கள் என்பது தான் சற்று நெருடலான விடயம். சோனகரிஸ்தான் கனவுகளில் வாழும் சோம்பேறி சமுதாயமாக நாம் வாழப்பழகி பல வருடங்களாயிற்று. பழைய சோனக தெருவை மீண்டும் பார்க்கலாம் ஏனும் ஏக்கம் என்பது ஒரு போதைவஸ்து பாவனையாளரின் ஏக்கங்கள் போன்றவை. நாம் அன்று வாழ்ந்த சோனக தெரு ஒரு கனவு. அந்த கனவை அசை போட வைப்பது தவறான செயல். நாமும் மயங்கி மற்றவர்களையும் மயக்கும் போதை வியாபார நிலையமல்ல யாழ் முஸ்லிம் இணையம். இனிமையான, பசுமையான சோனக தெருவை பற்றி நாம் கடந்த 22 வருடங்களாக நிறையவே கதைத்துள்ளோம்.

உலகம் மாறி விட்டது. நாடு, நகரம் எல்லாமே மாறிவிட்டது. தமிழர் போராட்ட வடிவம் உட்பட. யாழ்பாபணத்து பச்சை புல் நுணியில் நடைபயிலும் தம்பளாபூச்சி கூடத்தான் மாறி விட்டது. ஆனால் நாம் மட்டும் அதே பழைய புல்டோ கனவுகளில் சொக்கித்து போகிறோம். ஒஸ்மானியாவையும், அல்கிக்மாவையும் வைத்து புகைக்படக்கண்காட்சி நடாத்துவதால் எஞ்சப்போவது நாம் சோனவர், யாழ்ப்பாண சோனவர் எனும் எண்ணங்கள் மட்டுமே. அந்த எண்ணங்கள் கூட தமிழர் ஆட்டி காட்டும் அதிகப்படியான ஐந்து லட்ச ரூபாய் பணத்தில் காணியை தாரைவார்ப்பதில் கலைந்து போய் விடுகிறது.

எழுத முடியாதவர்களும், கனவுகான தெரியாதவர்களும், எதிர்கால சிந்தனைகள் பற்றிய அறிவில்லாதவர்களும் தான் வரலாற்றின் குப்பை தொட்டிகளை கிண்டிக்கொண்டிருப்பார்கள். சோனக வரலாறு எழுத. நாம் புதிய பாதையில் பயணிக்க வேண்டும். இஸ்லாமிய சோனக தெரு பற்றிய சிந்தனைகள் நமக்கு அவசியம். நமது கலாச்சாரம் சர்பத் கொடுப்பது என மார்தட்டுவதை விட்டுவிட்டு அடுத்த வீட்டுக்காரன் பசியில் இருக்கிறான என சிந்திப்பதே காலத்தின் தேவை. பள்ளிவாயல்களில் டைல்ஸ் பிடிக்கும் பணம் எத்தனையோ ஏழைகளின் கூரைகள். வரண்ட உள்ளங்களில் பசுமை எண்ணங்களை விதைப்பதில் என்ன பயன்?

யாழ் முஸ்லி்ம் இணையம் எதிர்வரும் காலங்களில் யாழ்ப்பாண முஸ்லிம்களின் வாழ்தல் தொடர்பான பிரச்சனைகளை அணுகி, அதற்கான விஞ்ஞானபூர்வமான, ஆக்கபூர்வமான திட்டங்களை பகிரும் ஒரு தளமாக தன்னை ஒழுங்குபடுத்தி கொள்ளல் வேண்டும். தனிமனித செயலணி எனும் பாதையை மாற்றி ஒரு கூட்டு குழுவின் செயற்பாடாக தன் எல்லைகளை அகட்டிகொள்ள வேண்டும். உலக ஒழுங்கியல் மாற்றத்திற்கு ஏற்றவாறும், அதிகரிக்கும் இஸ்லாமிய எழுச்சிகளிற்கு ஏற்றவாரும் யாழ்ப்பாண முஸ்லிம்களை தயார்படுத்தும் ஒரு தளமாக இயங்க வேண்டும்.

நான் ஏற்கனவே சொன்னது போல யாழ் முஸ்லிம்கள் ஒரு புள்ளியில் இணைவார்கள் என்றால் அது யாழ் முஸ்லிம் இணையத்திலேயே.

காரணங்கள் நிகழ்கால ஒத்தடங்கள். காரியங்கள் வருங்கால வாஸ்தவங்கள். அந்த அடிப்படையில் யாழ் முஸ்லிம்கள் தொடர்பான காத்திரமான செயற்பாடுகளிற்கு முன்னிற்கும் ஒரு இணையத்தளமாக தன்னை மாற்றிக்கொள்ளல் அவசியம். பசுமை நினைவுகள் எனும் போர்வையில் கனவுகளை சுமப்பவர்களாக யாழ் முஸ்லிம்களை பழக்கப்படுத்துவதும், அழைத்துச் செல்வதும் விபரீதமான எதிர் விளைவுகளையே உருவாக்க வல்லன.

“முதல் தர மனிதர்கள் திட்டங்களை பற்றியே பேசுவர், இரண்டாந்தர மனிதர்கள் விடயங்களை பற்றியே பேசுவர்” இதில் யாழ் முஸ்லிம் இணையத்தளம் எந்த தரத்தில் இருக்கப் போகிறது என்பதை நாம் சில பொழுதுகளில் காணலாம். நான் எழுதுபவை உங்களை நெறிப்படுத்தவேயன்றி வேறில்லை என்பது நானும் நீங்களும் அறிந்த உண்மை என்று நம்புகிறேன். அந்த நம்பிக்கைகளை மெய்படவைப்பதும், பொய்படவைப்பதும் உங்கள் எழுத்துக்களிலேயே உள்ளது.

அன்புடன்
அபூ மஸ்லமா
பிரதம ஆசிரியர் ஹைபர் தளம்