ஒத்துழைப்பு தாருங்கள் - யாழ் சின்னப்பள்ளி வாசல் நிர்வாகசபை தலைவர் எம்.எஸ். ஜினூஸ்

சுக்ரி இனாஸ்

யாழ் சின்னப் பள்ளிவாசலின் கட்டுமானப்  பணிகள் தொடங்கியுள்ளன. பள்ளிவாசல் கட்டுமானத்துக்கு சில இடையூறுகள் ஏற்படுத்தப்பட்டதாக கேள்விப்பட்டு அவற்றைப்பற்றி தீர விசாரிக்கும் நோக்குடன் அந்தப் பிரச்சினைகளுடன் சம்பந்தப்பட்டவர்களுடன் உரையாடினேன். அவர்களில்  சின்னப்பள்ளி நம்பிக்கையாளர் சபையின் தலைவர் எம்.எஸ். ஜினூஸ்  இது சம்பந்தமான சில வினாக்கள் கேட்கப்பட்ட போது அவர் அளித்த பதில்கள் பின்வருமாறு.

கேள்வி: சின்னப்பள்ளி கட்டும் பணி எவ்வாறுள்ளது?

ஜினூஸ்: தற்போது எட்டு  அறைகள் மீளக்கட்டப்பட்டுள்ளன. பெயின்ட் வேலை மற்றும் மின்சார இனைப்பு வேலைகள் மட்டும் செய்ய வேண்டியுள்ளது.  பள்ளிவாசல் கட்டமானத்துக்கான வரைபுகள் தயாரிக்கப்பட்டு தற்போது எமது கைக்கு கிடைத்துள்ளது. இன்ஷா அல்லாஹ்; அடுத்த வாரம் பள்ளியின் பிரதான கட்டிடத் தொகுதி வேலைகள் தொடங்கும்.

கேள்வி: நீர்கொழும்பில் வசிக்கும் தாங்கள் ஏன் யாழ்ப்பாணத்தில் பள்ளிவாசலை கட்டுகின்றீர்கள்?

ஜினூஸ்: யாழ்ப்பாணத்தில் தான் நான் பிறந்தேன். அது எனது தாயகம். சின்னப்பள்ளி எனது மஹல்லா. சிறு வயது முதல் வெளியேற்றப்படும் கடைசி நாள் சுபுஹு தொழுகை வரை அங்கேயே தொழுது வந்தேன். எனது உடன் பிறந்த சகோதரன் அடக்கப்பட்டுள்ள இடம் சின்னப்பள்ளி மையவாடி. எனது மூதாதையரும் அங்கு தான் அடக்கப்பட்டுள்ளார்கள். எனது பெயரில் எனக்கு ஒரு காணி சின்னப்பள்ளி வட்டாரத்தில் உள்ளது. நான் தொழுது வணங்கிய பள்ளி இடிந்து கிடப்பதை எனது மனம் ஏற்றுக் கொள்ளவில்லை. இதனால் தான் மஹல்லாவாசிகளை ஒன்று கூட்டி பள்ளிளை மீளமைக்கும் முடிவை எடுத்தோம். நான் எங்கு வாழ்ந்தாலும் சின்னப்பள்ளி தான் என்னை வளர்த்து மார்க்கத்தை ஊட்டிய  பள்ளி. அந்த வகையில் தான் எனது முயற்சி தொடங்கியது.

கேள்வி: தாங்கள் ஏன் யாழ்ப்பாணத்தில் மீள்குடியேறவில்லை?

ஜினூஸ்: நான் ஒரு கிராம அதிகாரி அரசாங்க உத்தியோகத்தில் இருக்கிறேன். நினைத்தபடி எனக்கு இடம் மாற முடியாது. 2009இல் பாதை திறந்த காலத்திலிருந்தே யாழ்ப்பாணத்துக்கு  மாற்றம் பெற  முயற்சி செய்தேன். தற்போது தான் அது அங்கீகரிக்கப்பட்டுள்ளது. இன்ஷா அல்லாஹ் வெகுவிரைவில் எனது தாயகப் பிரதேசம் சென்று எனது யாழ்ப்பாண முஸ்லிம் சமூகத்தின் மீள்குடியேற்றத்துக்கும் மக்களின் அன்றாடப் பிரச்சினைகளை தீர்ப்பதற்கும் என்னாலான முயற்சிகளை செய்வேன்.

கேள்வி: அங்கு ஏற்கனவே மீளக்குடியேறியிருப்போர் பள்ளியைக் கட்ட முன்வரவில்லையா?

ஜினூஸ்: அவர்களிம் பள்ளியைக் கட்டுவதற்கான வசதிகள் இல்லை. அவர்கள் சில நிறுவனங்களை அனுகியிருந்த போதிலும் அதற்கான உதவிகள் கிடைக்கவில்லை. அவர்கள் தகுதியற்றவர்கள் எனக் கூறி சில நிறுவனங்கள் அவர்களை நிராகரித்து விட்டது.

கேள்வி: சின்னப்பள்ளி விடயத்தில் மிகவும் குழப்பமான சூழ்நிலை நிலவுகின்றதே?

பதில்: நாம் பள்ளியை மீளக்கட்ட உருவாக்கிய சங்கத்தில் யாழ்ப்பாணத்தில் மீளக்குடியேறியுள்ளோரையும் சேர்த்தே மீளக்கட்டுமான குழுவை உருவாக்கியிருந்தோம். இடையில் சிலர் அவர்களின் மனதை மாற்றி பள்ளியை தாமே  நிர்வகிக்க முயற்சி  செய்துள்ளார்கள். அவர்களின் மூளைச் சலவைக்கு இவர்களும் ஆளாகியுள்ளார்கள். அதனால் பள்ளி கட்டுப்படாவிட்டாலும் பரவாயில்லை அதளை தாமே ஆள வேண்டுமென்ற சிந்தனை சிலரிடம் வந்து விட்டது.

கேள்வி: சின்னப்பள்ளி நிர்வாக சபை முதலில் தொடங்கப்பட்டதா? அல்லது மீள் கட்டுமான குழு முதலில் தொடங்கப்பட்டதா?

பதில்: சின்னப்பள்ளி மீள் கட்டுமான குழு 2011 மே 29 அன்று உருவாக்கப்பட்டது. வக்பு சபையால் அங்கீகரிக்கப்படாத நிர்வாக சபை 2011 ஜுன் 11ஆம் திகதி ஆரம்பிக்கப்பட்டுள்ளது.  தறபோது அங்கீகரிக்கப்பட்ட நிர்வாக சபை 2011 டிசம்பர் 18ஆம் திகதி நியமனக்கடிதங்கள் வழங்கப்பட்ட சபையாகும்.

கேள்வி: மீள்குடியேற்றக்குழுவில் யார் யார் உள்ளனர்.

இக்குழுவில் படித்தவர்கள் பணபலமுள்ளவர்கள் உள்ளார்கள். ஆசிரியர்கள், கணக்காளர்கள், பட்டதாரிகள், கட்டிடக்கலை நிபுணர்கள் பள்ளிவாசலுக்காக தமது பணத்தை அள்ளி வழங்கக் கூடியவர்கள் இருக்கிறார்கள். அவர்கள் நான் எதிர் பார்த்ததை விட திறம்பட மீள் கட்டுமானத்தை திட்டமிட்டுள்ளார்கள். அதில் சிலர் இது ஒரு மீள்கட்டுமான முயற்சியாக மட்டுமல்லாமல் மீள்குடியேற்றத் திட்டத்தையும் மையமாக வைத்து செயற்படுத்தப்பட வேண்டுமென்ற கொள்கையுடன் உள்ளனர். எல்லாம் வல்ல அல்லாஹ் அவர்களுக்கு ஆரோக்கியமான நீண்ட ஆயுளைக் கொடுப்பானாக!

கேள்வி: தற்போதுள்ள குழப்பங்கள் பற்றி

பதில்: பள்ளிவாசலுக்கு சொந்தமான அறை வேலைகள் ஆரம்பிக்கப்பட்டுள்ளன. இந்நிலையில் ஒஸ்மானியா பாடசாலை ஆசிரியர் ஒருவருக்கு அதில் ஒரு அறை வழங்கப்பட்டிருந்தது. அவரை பள்ளிவாசலின் பிரதான கட்டிடத்திலுள்ள அறைக்கு மாறி தற்போதுள்ள அறையை கட்டுவதற்க தருமாறு கேட்டோம். அதைத் தர அவர் மறுத்து விட்டார். பிறகு பள்ளியினுள்  உள்ள அறையின் திறப்பை வாங்கி அங்கே சீமெந்து போன்ற பொருட்களை பாதுகாக்க எண்ணி திறப்பை வாங்கினோம்.

கேள்வி: பள்ளிகட்டுவதிலுள்ள  பிரச்சினைகள் எவை?

ஜினூஸ்: அறைகள் கட்டப்பட்ட போது ஆசிரியர் இருந்த அறையையும் உடைத்து செப்பனிட வேண்டியிருந்தது. அவ்வறையின் கூறையமைப்பை மற்ற அறைகளின் அமைப்புக்கு ஏற்றவாறு உயர்த்தி மாற்றம் செய்ய வேண்டியிருந்தது. அதனால் அவருக்கு எமது செலவில் அறையொன்று எடுத்துத் தருகின்றோம் என்று கூறினோம். அதற்கு அவர் எங்களது நிர்வாக சபையை தான் ஏற்கவில்லை என்றும் அதனால் அறையிலிருந்து வெளியேற முடியாதென்றும் கூறிவிட்டார்.

கேள்வி: நீங்கள் யாழ் சென்று நேரடியாக பைசல் மௌலவியிடம் சென்று அவரை உடனடியாக வெளியேறும் படி கூறினீர்களாமே, உண்மையா..?

ஜினூஸ்: சிலர் இஸ்லாமிய வேடமிட்டுக் கொண்டு பொய்களை கட்டவிழ்த்து விடுகிறார்கள். அறையை விட்டு பள்ளியினுள் உள்ள அறையில் தங்குமாறு ஒரு வாரத்துக்கு முன்பே நாங்கள் வேண்டியிருந்தோம். பைசல் அதற்கு மறுப்பு தெரிவித்து தான் தற்போதுள்ள அறையிலேயே தங்கவுள்ளதாக அடாத்தாக தெரிவித்தார். அதன் பிறகு தான் மற்ற அறையின் சாவியை  வாங்கி அதனை இரவில் 10 பேருடன் சென்று மிரட்டிய சம்பவம் நடந்தது. இந்த விடயத்தைப் பற்றி கதைப்பதற்கும் மீள்கட்டுமானப் பணிகளை பார்வையிடவுமே நாங்கள் யாழ் சென்றோம்.

நாங்கள் யாழ் சென்றவுடன் முதலில் கட்டிட பணிகளைப் பார்வையிட்டோம். அப்போது பைசல் அறையில் இருக்கவில்லை. நிர்வாக சபை உபதலைவர் ஜாபிரை சந்தித்து அவரை யார் யார் மிரட்டியது என்ன நடந்தது போன்ற விடயங்களை விசாரித்தோம். எமது நிர்வாக சபையின் செயலாளர் எம்.ஏ.சி. சனூன் மூலமாகவே பைசலுடன் கதைக்க எண்ணினோம். இடையில் காரிஸ் என்பவர் பைசலுடன் கதைக்க என்னை அழைத்த போது ஜனாப். எம்.ஏ.சி. சனூன் வரும்வரை பைசலுடன் கதைக்க முடியாது என்று கூறிவிட்டேன். 

கேள்வி: நீங்கள் திடீரென எழும்பச் சொன்னது தவறு தானே..?

ஜினூஸ்: அறைகளை கட்டும் பணி ஜனவரி 27ஆம் திகதி ஆரம்பிக்கப்பட்டது. அதற்கு முன்பே அறை தேவை என்பதை நாம் தெரிவித்து விட்டோம். எங்களது மீள்கட்டுமானம் அமையப் போகும் விதத்தையும் விளக்கியிருந்தோம். அவ்வாறிருந்தும் அவர் ஒத்துழைக்கவில்லை. இருந்த போதும் எமது நிர்வாக சபை கட்டிட நிர்மாணக் குழுவை அனுகிய போது அவர்கள் பைசலுக்கு தேவையான அறையொன்றை ஒரு மாத காலத்துக்கு தமது செலவில் எடுத்துக் கொடுப்பதாக கூறினார்கள். இந்த விடயம் கூட்டத்தில் வைத்து பைசலுக்கு விளக்கப்பட்டது. அதற்கும் அவர் மறுப்புத் தெரிவித்ததுடன் உங்களை நான் நிர்வாக சபையாக ஏற்றுக் கொள்ளவில்லை. அதனால் எழும்ப முடியாது என்று இறுமாப்புடன் கூறிவிட்டார்.

கேள்வி: நீங்கள் இவ்வளவு தூரத்துக்கு அப்பால் இருந்தும் பள்ளி அறை வேலைகளை ஏற்கனவே ஆரம்பித்து விட்டீர்கள். அவ்வாறிருந்தும் நீர்கொழும்பிலிருந்து கொண்டு இங்கு என்னத்தை பிடுங்கப்போகிறீர்கள் என்று கேட்டார்களா?

ஜினூஸ்: அறைகளை கட்டப்படுவதை பார்த்த பிறகும் அவ்வாறு கேட்டது எமக்கு ஆச்சரியமாகப் படுகிறது. எமது சகோதரர்களை எமக்கெதிராக ஏவி விட்டு அதில் இலாபமடைய நினைக்கின்றனர் சிலர். அல்லாஹ்வுக்கு அஞ்சாமல் செய்த்தானின் காரியங்களை செய்யும் இவர்களை எமது சகோதரர்கள் மிக விரைவில் இனம் காண்பார்கள்.

கேள்வி: இறுதியாக என்ன கூற விரும்புகிறீர்கள்..?

ஜினூஸ்: எங்களுக்கு நிரந்தரமாக 24 மணிநேரமும் பள்ளியில் தங்கக்கூடிய இமாம் ஒருவர் தேவை. மேலும் பள்ளிவாசலில் குர் ஆன் மத்ரஸா நடத்துதல் போன்ற வேலைகளையும் இமாம் செய்ய வேண்டி வரும். மேலும் எமது பள்ளியில் திக்ரு மஜ்லிஸ் கபுராளிகளுக்கான துஆ மஜ்லிஸ் என்பன ஒவ்வொரு வாரமும் இடம்பெறும். 1744களில் இருந்து முஸ்லிம்கள் அங்கு அடக்கப்பட்டுள்ளார்கள். சின்னப் பள்ளி வழமையின் படி எமது மூதாதையரான கபுராளிகளுக்கு ஒவ்வொரு வாரமும் ஞாயிறு மஹ்ரிப் தொழுகையின் பின்னர் திக்ரு மற்றும் குர்ஆன் ஓதி அவர்களுக்காக துஆ செய்யப்படும். இது யாழ்ப்பாணத்தில் மீளக்குடியேறியுள்ளவர்களினதும் ஏனைய பிரதேசங்களில் வசிக்கும் யாழ் முஸ்லிம்களினதும் விருப்பமும் வேண்டுகோளுமாகும். மேலும் இப்பள்ளி சமூகத்திடையே பிளவை ஏற்படுத்தாத சகல இயக்கங்களுக்கும் பொதுவான பள்ளியாக இருக்கும் என்பது தான் அதனுடைய யாப்பு. பள்ளிக்கு குழப்பங்களை ஏற்படுத்தாத பொதுவான ஒரு இமாமே தேவை. மேற்சொன்ன அமல்களைச் செய்யக் கூடிய கீழ்படிவுள்ள மௌலவியையே மஹல்லாவாசிகள் விரும்புகிறார்கள். பள்ளிவாசல் கட்டி முடிக்க இன்னும் ஒன்றரை மாதங்கள் செல்லும். அதன் பிறகு பள்ளிக்கு முழு நேர இமாமை நாங்கள் நியமிப்போம்.

நாங்கள் 250 மைல்களுக்கு அப்பாலிருந்து எமது நேரத்தையும் பணத்தையும் செலவழித்து யாழ் வந்து இந்தப்பள்ளியை கட்டுகின்றோம். பிரயாணம் கூட மிகவும் சிரமமானது. இவற்றையெல்லாம் தாங்கிக் கொண்டு யாழ் வரும் எங்களை யாழ்ப்பாண முஸ்லிம்கள் வரவேற்க வேண்டும். அவ்வாறு செய்யாவிட்டாலும் பரவாயில்லை எமக்கு எதிர்ப்புகளை தெரிவிக்காது இடையூறுகள் ஏற்படுத்தாது இருக்க வேண்டும்.

பள்ளி கட்டுமானத்தில் நிறைய திட்டங்கள் தீட்ட வேண்டியுள்ளது. அத்திவாரம் அமைத்தல் தூண்கள் அமைத்தல் கொன்கிறீட் ஸ்லப் போடுதல் மின்சார வேலைகள் என்று ஏராளமான வேலைகளை திட்டமிட வேண்டியுள்ளது. இந்நிலையில் எமக்கு பிரச்சினைகளை ஏற்படுத்தி பிரச்சினைகளில் எங்களை சிக்க வைத்து மேற்போந்த திட்டங்களை நிறைவேற்ற விடாமல் தடுப்பது இப்றாகிம் நபியை (அலை) ஜம்ரதுல் அகபா, ஜம்ரதுல் ஊலா மற்றும் ஜம்ரதுல் உஸ்ஸா போன்ற இடங்களில் தடுத்து நிறுத்தியது ஞாபகம் வருகின்றது.

நாம் இன்ஷா அல்லாஹ் பள்ளியை எப்பாடுபட்டாவது கட்டிமுடிப்போம். பள்ளிவாசல்கள் இறைவனின் வீடுகள். அவற்றை கட்டுவதை குழப்புவது இனைவைத்தலில் கொண்டுபோய் விட்டுவிடும். தனியொருவரின் தூண்டுதலுக்கு யாரும் இறையாகிவிடாதீர்கள்.  தயவு செய்து ஒத்துழைப்பு வழங்காவிட்டாலும் பரவாயில்லை. இடையூறு விளைவிக்காதிருக்குமாறு சம்பந்தப்பட்டவர்களை  கேட்டுக் கொள்கின்றோம்.