ஷைக் பட்டதாரிகளா..? அரபு சேர் பட்டதாரிகளா..??

பேருவலை ஜாமிய்யா நளீமிய்யா கல்விப் பீடம் நளீம் ஹாஜியார் அவர்களால் உருவாக்கப்பட்டது. இதனை உருவாக்கியதன் மூலம் முஸ்லிம் சமூகத்திற்கு பாரியதொரு சேவையை நிறைவேற்றிய பெருமை அவர்களையே சாரும். 

அந்த மகான் தனது வாழ்வில் மார்க்கப் பேணுதலையும், இறை வணக்கத்தையும் கடைப்பித்தவராவார். அதனை அவர்களின் அகம் சான்றாக எடுத்துக் காட்டுகின்றது. தொப்பி அணிந்தவரான, நெத்தியில் கறுப்பு அடையாளம், தாடியுடன் கூடிய பிரகாசம் உள்ள முகம் அவர்கள் தனது வாழ்வில் எந்த  அளவு பேணுதலுடையவராக ஒரு வணக்கசாலியாக இருந்திருப்பார்கள் என்பதற்கு  சான்றாகவே இருக்கின்றது. 

இந்த நல்ல மகான் உருவாக்கிய அந்த ஜாமிய்யா நளீமிய்யாவில் இருந்து பட்டம் பெற்று வெளியேறும் பட்டதாரிகளை உற்று நோக்கும் போது மிகவும் வேதனையளிக்கின்றது. பொது மகனாகிய அந்த மகானிடம் இருந்த ஈமானிய உணர்வையாவது தன்னகத்தே கொண்டு அல்லாஹ்வை திருப்திப் படுத்தாமல் இஸ்லாம் பறிபோனாலும் பறவாயில்லை நவீன யுகத்தை திருப்திப்படுத்தினால் போதும் என்ற மனோபக்குவம் உடையவர்களாகத்தான் அவர்களில் அதிகமானவர்களின் நிலை இருக்கின்றது. 

இதற்கு அவர்களின் தோற்றமே சான்று பகர்கின்றது. நான் அதிகமாக நளீமிய்யாக்களுடன் தொடர்பு வைத்துள்ளதனால் இதனை உற்று நோக்க முடிகின்றது. அவர்களின் ஈமானில் பலவீனமான வார்த்தைப் பிரயோகங்கள், நபியவர்களின் ஸுன்னாவைக் கடைபிடிப்பதில் வெட்க சுபாவம், தொழுகையை நிறைவேற்றுவதில் பேணுதலின்மை போன்ற நடவடிக்கைகள் சான்றாக இருக்கின்றன. 

குறிப்பாக அவர்கள் ஆடை அணிவதைப் பார்த்தால் அநேகமானவர்களின் ஆடைகள்; கரண்டைக்காலுக்குக் கீழ் இருக்கின்றது. கரண்டைக் காலுக்குக் கீழ் ஆடை அணிவதைப்பற்றி ஹதீஸ்களில் கடுமையான எச்சரிக்கைகள் வந்திருக்கின்றன. முன்மாதிரியாக இருக்கக் கூடிய மூத்த நளீமிய்யாக்களின் நிலைமையும் இவ்வாறுதான் இருக்கின்றது என்றால் இது எவ்வளவு கவலைக்கு இடமான ஒரு விடயம். இவ்வாறு கடுமையான எச்சரிக்கைகள் வந்தும் கூட அவைகளை கணக்கெடுக்காமல் தமது ஆடைகளை அமைத்துக் கொள்கின்றார்கள் என்றால்   அவர்கள் மார்க்க விடயங்களுக்கு முக்கியத்துவம் அளிப்பதன் அளவை எடைபோட்டுக் கொள்ளலாம்.  

இங்கு நான் சொல்ல வரும் முக்கிய விடயம் என்னவெனில், ஜாமிய்யா நளீமிய்யாவில் அரபுப் பாடத்தை திறமையாகவும், ஷரீஆத்  துறையை மேலோட்டமாகவும் படித்துக் கொடுத்து, உலகளாவிய பட்டங்களுக்குரிய பாடங்களுக்கு முக்கியத்துவம் கொடுத்து கற்பித்து ஷைக்-மார்களாக வெளியாக்குவதன் மூலம் பிற்காலத்தில் நவீன குழப்பவாதிகள் உருவாக்;கப்படுகின்றார்கள் என்பதாகும். ஆழம் அறியாமல் காலை விடாதே என்ற பழமொழிக்கு ஏற்ப தற்போது நிலவுகின்ற  சில முக்கியமான மார்க்கப் பிரச்சினைகளில் இவர்கள் ஆழம் அறியாமல் தலையை விட்டு சிக்கித் தடுமாறிக்கொண்டிருப்தை எமக்கு ஒரு படிப்பினையாக எடுத்துக் கொள்ளலாம். 

எனவே ஷரீஅத் துறையும் அங்கு கற்பிக்கப்படத்தான் வேண்டும் என்றிருந்தால் தயவு செய்து ஆழமாக கற்பித்துக் கொடுத்து அஷ்-ஷைக் என்ற பட்டத்துடன் அவர்களை வெளியாக்கலாம். அது சாத்தியமில்லையென்றால் தயவு செய்து  உலகளாவிய பட்டப் படிப்புகளுடன் அரபு மொழியையும் கற்பித்து 'அரபு சேர்களாக' வெளியாக்குங்கள். 

இந்த எனது தாழ்மையான அபிப்பிராயத்தை நளீமிய்யாவின் பணிப்பாளரான கலாநிதி சுக்ரி, அஷ்-ஷைக் ஏ.சீ அகார் முஹம்மத், அஷ்-ஷைக் எஸ்.எச்.எம். பழீல் அவர்களிடம் முன்வைக்கின்றேன். நீங்கள் வாழ்ந்த காலம் அதிகம் வாழப் போகின்ற காலம் மிகவும் அரிது. இக்காலப் பகுதிக்குள் நளீம் ஹாஜியார் அவர்களின் எதிர்பார்ப்பின் பிரகாரம் அல்லாஹ்வை திருப்திப்படுத்தும் வண்ணம் இதற்கு அழகான தீர்க்கமான ஏற்பாடுகளை செய்வீர்கள் என  எதிர்பார்க்கின்றேன். 

வல்லவன் அல்லாஹ் நம் அனைவரையும் சிறந்த நேரான வழியில் இட்டுச் செல்வானாக! ஆமீன்.

ஸாஹிர் ஹுஸைன்

கல்முனை